港鐵噚日正式延長港島綫，向來最愛「成功爭取」嘅民建聯，被街坊投訴喺最近一星期，於港島南區同中西區掛出違規嘅超長橫額抽水贈興，橫額上有民記中西區區議員張國鈞個樣，有人更喺部份超長橫額貼上「非法橫額，自吹自擂，影響市容」警告字句，以示不滿。
民主黨中西區區議員許智𥧌話喎，民記呢種「延長式」橫額「百分百係違規」，仲話唔少超長banner放喺無獲當局批准嘅位置，所以已向地政署同食環署投訴，但當局至今未採取行動，唔知係咪有意向民記「放水」，仲話早喺民記創黨之前，港島區居民已經爭取起地鐵，民記𠵱家講到純粹係佢哋嘅功勞，絕對係無恥抽水之舉。張國鈞回應話，橫額係支部同事貼嘅，「（詳情）要問番同事先，具體操作我唔知」。