雨傘運動暫告一段落，泛民團體將雨傘運動轉移至民間，主力工作包括呼籲市民登記做選民，以便喺明年區議會、後年立法會選舉發揮「首投族」嘅力量。噚日香港本土毛孟靜同范國威喺旺角行人專用區擺檔搜尋「首投族」，反應唔錯，唔少廿幾、卅幾歲嘅人上前登記做選民，聲言要剔走低質素議員，Miss Mo話同類行動陸續有來。
好似25歲嘅鄭先生咁吖，佢話以往只係齋睇新聞冇行動，覺得政治、公義「未殺到埋身冇問題」，但自從雨傘運動後，開始察覺要有所行動先能改變社會。過咗18歲十幾年嘅梁先生，噚日先至登記做選民，佢話以前一啲都唔關心政治，連議員嘅名都未必講得出，但𠵱家佢覺得手上一票其實好重要，「希望用選票剔走啲低質素議員」。