王敏德開舖獲MJ三哥撐場

王敏德開舖
獲MJ三哥撐場

王敏德（Michael）斥資7位數字的自家品牌MW前晚在銅鑼灣新店舉行開幕活動，太太馬詩慧及三名子女曼喜、麗嘉及躍穎等總動員撐場。Michael的好友馬清偉帶同女友Winnie及兒子、薛凱琪的緋聞男友、澳門威尼斯人酒店高層Reggie Martin、黃佩霞、寇鴻萍母女等人支持，當中最為特別是米高積遜（Michael Jackson）的三哥Jermaine Jackson前來，在場更有賓客帶同Jackson 5的黑膠給他簽名。Michael一盡地主之誼帶他上山頂睇夜景，更送了一件價值6千多元的仿皮褸作答謝。

王敏德搞自家品牌開舖，作為太太的馬詩慧送吻祝賀。

米高積遜05年在加州出席孌童案時，Jermaine（右）陪伴應訊。

馬詩慧自嘲數口差

馬詩慧昨日接受電話訪問，大讚Jermaine：「佢之前去咗澳門睇演唱會，佢同Michael嘅朋友好熟，所以嚟支持吓，佢好nice。」記者笑她榮升老闆娘，問她會否幫手管數，她表示：「Michael呢間舖計劃咗兩年，一步一步好似跨欄咁，終於有自己牌子，成家人都有幫手，阿仔係Michael no.1粉絲，阿女都有份畀意見，唔好以為佢鬼佬，佢思想好傳統，已經計劃定將盤生意交畀仔女，我自己數口差，少插手為妙，不過都好戥佢開心做呢個project，梗係希望佢好生意搵到錢。」
採訪：唐如

曾與薛凱琪傳過緋聞的澳門威尼斯高層Reggie Martin（右）與黃佩霞合照。

一向與王敏德老友的馬清偉（左）與大仔Justin前來。