日圓持續貶值，對鍾意遊日嘅港人嚟講直情係聖誕佳音，連前政務司司長唐英年都趁住聖誕假，一家大細去日本旅遊兼鳩嗚。有讀者向八方報料，前日見到唐唐一家大細現身大阪，向來鍾情紅酒嘅佢，精挑細選緊日本威士忌。口味偏甜嘅日本威士忌，近年喺香港冒起，唔少港人都like，估唔到唐唐咁醒，不忘掃平貨。
八方聽聞，唐唐早前同友人聚會時，已經透露聖誕會同屋企人去日本度假，佢都知日本係港人度假勝地，預咗被人撞到㗎嘞，估唔到真係俾佢講中。有讀者向八方報料，話上周六喺日本大阪阪急百貨店遇到唐唐一家人，唐唐買緊日本威士忌，仲負責畀錢（圖），但冇講明佢買乜嘢牌子。
準備交政改建議
原來唐唐出發前都講過有意掃啲日本威士忌返港，仲計過度過，話每人可以免稅帶1升烈酒返港，佢全家一人一支咪好抵囉！其實除咗紅酒，唐唐近期愛上鑽研日本清酒，唔知有冇順道買埋？唐唐發言人證實，唐唐同屋企人去咗日本玩，噚日已經返港嘞。而據知身兼全國政協常委嘅唐唐，玩完唞完就係時候交功課，着手準備緊政改建議，希望方案可以連過中央、政府、泛民同市民呢四關。
李八方
mailto:[email protected]