陳勳奇昨日以FKCO香港全接觸空手道總會榮譽會長身份，出席在尖沙嘴舉行的空手道公開賽活動，這是他自愛女陳杏妍（陳開心）兩個月前墮樓離世後，首度在公開活動露面，他更開腔談及喪女之痛，坦承若多抽時間陪伴家人可能可以避免悲劇發生。
「檢討後好遺憾」
陳勳奇說：「靠工作忘記悲傷，𠵱家同時籌備三套電影，係大哥（成龍）鼓勵我，唔好每套戲由零開始搞，可以同時籌備幾部。大哥今年心情都非常唔好，個仔（房祖名）又有事、部戲又有事，我哋呢啲所謂嘅硬漢，就要識忘記哀傷，唔好畀自己空閒。」問到愛女離開後有否多抽時間陪伴家人時，陳勳奇一度紅眼哽咽說：「自己都檢討過以往嘅付出同成績，好遺憾，如果我有多啲陪伴家人，可能悲劇就唔會發生，過咗去就唔想再提。」
早前成龍新片《絕地逃亡》於欣澳拍攝時發生翻船意外，攝影師陳國雄（高佬）墮海身亡，原來陳勳奇也在場，他說：「唉，嗰日我喺現場同大家傾《十二生肖續集》劇本，本來拍完當日跳水戲，第二日拍埋爆炸就大功告成，仲講煞科party點令大家高興吓，跟住製片就衝入嚟話『大哥，反艇呀』。」
長一智莫欺水
陳勳奇續說：「我哋出去睇，全個海都係白頭浪，現場應該得廿幾呎水深，但係太大風，打晒燈都黑麻麻。大哥就不斷指揮，有兩隻舢舨救人，有個攝影助手就喺石邊救人。大家以為全部人脫險，點知就係唯一着住救生衣嘅佢失蹤。到警察、消防到場，反咗嗰隻艇吹返埋岸，消防揭起先發覺佢困咗喺下面。」問到日後可會檢討拍攝安全？陳勳奇說：「只能講句經一事長一智、欺山莫欺水。」
採訪、攝影：藍文浩