新馬錦標近年由高分馬玩晒，畢竟同齡馬匹較量，經驗同進度好重要，今屆情況一樣，呢日戲肉第四場1400米新馬錦標，結果亦由高分馬建功，上仗大勝的蘇廐馬「活力小駒」，今次增程初跑千四米由頭帶到尾，喺潘頓胯下連捷，捧走呢項2014年最後盃賽，二、三名順序係「藍天飛馬」同「龍城勇將」，換言之，今場三重彩係由三匹新勝馬構成。
自從「友瑩格」贏出香港短途錦標後，潘頓同蘇保羅做咗票房保證，「活力小駒」之前未跑過千四米，臨場都可以越賣越熱，結果由開閘到衝線都係最快一駒，影相氣走「藍天飛馬」奪標。不過今場其實好險，直路「活力小駒」曾帶離好遠，潘頓有啲托大，一直唔開鞭，直至最後100米見「藍天飛馬」逼近，潘頓才狂鞭，僅僅以短馬頭位頂住「藍天飛馬」的衝剌掄元，險過剃頭。
「藍天飛馬」鞍上人韋達繼香港短途錦標騎「幸福指數」飲恨做阿二後，再一次喺大賽受制於宿敵潘頓。至於「龍城勇將」贏完千二跳至千四米，雷神停賽換李寶利，名次倒退到第三名，多少同排檔太外有關。