爆開有條路，第七場爆完「常妙星」，第八場整條萬五蚊Q畀馬迷嘆，呢場三班1400米由落飛馬蘇廄「競技英雄」勝出，潘頓連埋第四場廐侶「活力小駒」捧新馬錦標，停賽六日前夕同蘇保羅攜手起孖兼捧盃，第八場跑第二係326倍巨冷「百利多」，大熱門「歡樂小子」得第三，81倍「馬上發財」則跑第四，三重彩同四連環都派11萬幾，冷到嚇親人！
今場由「一馬當先」放頭本來唔出奇，不過呂卓賢卻放得快到離奇，第二段20秒69，呢種段速平時係直路賽至見到，結果「一馬當先」入直路冇耐就自動慢車，任過唔嬲；至於轉倉初出之「競技英雄」食正形勢，孭住133頂磅都能夠喺外叠一衝過晒，潘頓收韁贏馬起孖，「百利多」臨門追過「歡樂小子」跑第二，位置派627蚊創歷季新高。賽後呂卓賢以身體不適為由退出餘下場次，元旦跑唔跑暫時未知。
「競技英雄」馬主華協會團體成員包括「軍事出擊」馬主梁芷珊，佢成為繼「常妙星」朱明雅後，呢日另一位贏馬女馬主，此駒以七歲之齡投蘇廐初出即贏，老而彌堅。
梁芷珊剛去土耳其過聖誕節，回港後即有聖誕禮物，與丈夫羅傑承一起拉頭馬。梁芷珊說：「『競技英雄』排11檔兼負重磅，加上轉倉初出，賽前我未敢抱太大信心，結果馬兒竟能取勝，我們當然開心，可能牠是大隻仔，頂得住重磅啦！」
蘇保羅說：「『競技英雄』今仗遇到瘋狂快步速，形勢變得混亂，此駒落三班始終有利，加分後升上二班，優勢會減弱。」