去台灣跑個步啫，查實同香港有乜唔同喎，結果喺兩個鐘頭入面我同其他香港跑友都搵到答案嘞。
又回到最初的起點，5點3去到信義區，集合地點自由進出，大台開始有啲民俗舞蹈搞吓氣氛，有啲啦啦隊打吓筋斗，啲跑友們行嚟行去打招呼傾閒偈多，selfie亦唔少，我都唔例外，港台一家親嘛，氣氛輕鬆到差啲熱身都唔記得做。開跑前台北市長出嚟打招呼，不過都係過一過鏡嗰隻，好快落台冇話喧賓奪主，搭正7點開跑嘞，半馬、全馬一齊出發，有啲亂，但係大家嘻嘻哈哈咁逼住慢行，冇人扮勁抽頭，快得幾多吖。
喺市中心開跑，路兩邊警察好少，街坊就差不多係由頭到尾都有，唔係就咁企喺度睇，係有預謀咁打扮好同你打氣，有扮蕉嘅細路，有扮台妹嘅台媽，有扮埃及妖后嘅少女，打扮其實唔算好似，但燦爛笑容搭夠。而且佢哋仲好主動伸出熱情之手同你high 5，好似同學仔咁，那些年錯過嘅都一次過返晒嚟，好想再回到那些年的時光呀。
轉咗兩個街口，竟然見到有啲跑友跑跑吓衝咗入去便利店，心諗唔係未食早餐吓話，但一路跑一路有人跑入舖頭喎，又有啲係好輕鬆咁行番出嚟，原來係入去解決鬆一鬆，最厲害係派出所大家都自出自入，警察大哥個廁所都係歡迎借用㗎喎。睇到我囉囉攣都想去埋一份，shopping會傳染，去廁所都會！跑到一半開始難捱嘞，好在四圍都係風景，望下陽明山睇下中正堂，當然亦要多謝各位keep住爬頭嘅台兄台妹，每一個超越我身邊嘅時候，總係畀咗我額外動力想跑番過佢頭，同佢正面打個招呼，雖然通常都係目送佢哋背影多。
終於死吓死吓返到終點，嘩半馬都有牌呀，好耐冇攞過牌嘞，一個銅牌對未瞓醒嘅瞓友嚟講係無聊，對我哋晨咁早就同自己過唔去嘅呢班跑友就係無價！
咦，又見到頭先爬我頭嗰位台妹，不如合照一個，等我認住你，下年可以爬番你頭。
KEYMAN
節目主持
電郵：mailto:[email protected]