樓價貴好多後生仔想置業遙不可及，但馬主二代當然就易得多啦，早排報道過「魚躍鳥飛」馬主關百豪，購入一個2,200萬北角新盤柏傲山畀個仔「上車」；近日另一個幸運兒，就係「搖錢樹」團體成員郭兆明嘅公子。話說郭兆明以870萬買咗個「喜韻」三房戶，計劃送600萬首期畀阿仔，阿仔只須供270萬，咁嘅老竇去邊度搵呀？
當然，600萬對郭兆明唔係大數目，佢可以話一代奇人，做過拳手、汽車維修，之後涉足唔同生意，選過立法會議員，曾修讀佛學博士學位，自言中過幾次巨額三T，家陣係萬福珠寶老闆，亦係網台主持人。
雖然講到養馬，郭兆明嘅資歷較淺，但佢同幟哥黃永幟等人合夥嘅「搖錢樹」都算唔錯，前仗初戴眼罩，喺田草1800米贏馬，臨尾話過就過，擺明仲有大把在手，上次換人兼2000米太長輸咗，可以當回氣，今次操足跑泥地1800米，勝在對手好普通，話晒郭兆明送600萬畀個仔唔係小數目，佢當然希望贏番啲獎金幫補吓啦！