【本報訊】港鐵西港島綫通車，帶動附近樓價急升，地產狂潮之中，有茶餐廳老闆懶理市道火熱，堅持保留自置的500萬元唐樓單位做員工宿舍，免費讓無殼夥計入住。1967年開業的祥香園是西環三寶之一，作為區內收購潮及加租潮下碩果僅存的老店，老闆周錫豐說：「夥計要住，咪當賺少啲囉。」夠生活毋須賺到盡，老店人情，較小店的馳名奶茶更香氣撲鼻。
記者：呂麗嬋
在祥香園做了30幾年，光哥的青葱歲月都在這裏過。「買唔起樓，咪以呢度為家，如果執笠，真係唔知可以去邊」。由水吧到樓面一腳踢，幾十年過去，西環變了天，在茶餐廳打工的光哥，仍舊每天換上灰白制服，過着「樓下返工、樓上（宿舍）瞓覺」的簡單生活，「最好係連交通費都慳埋」。摩打手抹枱，匆匆拋下這一句，又一支箭去了招呼客人。
倘捱貴租或結業
港鐵通車，人流最旺的卑路乍街，成了發展商的收購樂園，開業47年的祥香園，是西環三寶僅剩的一寶。69歲的祥香園老闆周錫豐最欷歔。「𠵱家嘅心態係做得幾耐得幾耐」，周錫豐透露舖位月租六萬元，若果要捱貴租，未必可經營下去，他也堅持保留員工宿舍，免費讓無殼夥計入住。「茶餐廳工時長，做嘅都係基層，以前嗰個年代宿舍好普遍，只係樓價升，好多賣咗，如果唔係，啲劏房點會咁受歡迎？」
周老闆早年買下祥香園樓上單位，做貨倉兼員工宿舍。記者隨他到宿舍，除了放了三張碌架床，電視冷氣和一般家庭小電器一應俱全，洗好的衣物晾在一旁，「高峯期放咗四張碌架床，𠵱家住緊四個人」。
茶記夥計多是基層寡佬，要不就在內地娶老婆，假期返大陸，平日住宿舍，周老闆笑言有時也會在宿舍留宿，「以前埋數埋得夜，就喺度過夜，冇講話乜太子爺，大打雜就真」。記者稱讚他是好老闆，原本口若懸河的他竟然滿面靦腆，擺擺手說：「以前個個都係咁，個單位廿幾年前買落，放貨要地方，加上夥計要住，咪當賺少啲囉。有地產代理話升到500萬，廿幾年前先至32萬，不過都係紙上黃金，有乜用？」
根據資料，祥香園舖位業主相信是周錫豐與妻子家族持有的公司，周於1987年買入做宿舍的單位，區內地產代理稱，同類唐樓現時做價500萬元合理，如有發展商看中收購，價錢或更高。
「惟有見步行步」
原本當職業司機的周錫豐，是老店的第二代，34歲那年，六旬父親急召他這個長子回來幫手，自言怕悶的他卻守着小店，一做36年。「以前住九龍城，日日4點半坐通宵小巴過嚟開舖，70年代嘅西環仲好荒蕪，呢條街叫最旺，周圍都係小販，對出又有屠房，由朝到晚都聞到豬車嘅氣味」。街坊生意，平平穩穩，足夠養妻活兒。只是物換星移，一些事一些情，到底留不住。
80年代，屠房欄商撤走，熟悉的豬車味消失了；再後來，西港島綫落實興建，樓價飆升。一條卑路乍街，收購後重建、呎價上萬的單幢式豪宅，比比皆是；要不就是形形色色，追求最高租金回報的集團式高級劏房，「唔係自己舖，始終擔心會加租，惟有見步行步」。港鐵通車，交通方便了，但幾成文化遺產的老店人情，能否敵過自遠而近的隆隆打樁聲？真正天曉得。
