話咁快又到年尾，歐洲各地聯賽好多都歇冬，聖誕同新年得番英國波，球迷冇咩選擇，大家專注喺英超，希望今次提供兩場英超可以幫到自己搵啲水腳睇省港盃，咁就正嘞。
今次心水有今晚星期日第4場修咸頓對車路士嘅入球「大」，修咸頓雖然仲係排前列，但狀態真係冇早輪咁好，無論主場、作客都輸到冇朋友，好波之人積洛迪古斯受傷仲未出得，爭勝要靠意大利佬加斯安奴柏利。
至於車仔方面有法比仔（左二）上仗復出，即刻又有助攻，迪亞高哥斯達亦破咗入球荒，要執多幾粒都唔係難事，入球「大」有2.02倍，又OK喎。另一場係星期日第8場昆士柏流浪對水晶宮，玩「角球大細」，又要個「大」。昆士柏最近有贏有輸，但比季初已經好咗好多，主力前鋒查理柯士甸入球頻頻，呢啲典型英倫前鋒要入波，梗係開多啲角球畀佢頂啦，而水晶宮最近問題多多，攻不銳守不穩，一直喺球隊左右大局嘅主力防中積甸拿克受傷，防守少咗佢影響好大，角球「大」有2.02倍，乘埋超過4倍，過到關周中睇省港盃就輕鬆好多。
心水寫完，收到兩呎長來電，識阿長咁耐周時電話傾吓近況，我問佢西北地區隊近排點解好似冇季初咁搶嘅，佢話：「領隊，大家喺球圈都咁多年，操練向來照做，重要係球員心態；近排社會上發生啲嘢，班細路同上面睇法唔同，搞到連操練都靜晒，教練團見到都冇晒符！」希望時間可以解決到呢啲問題啦。
本地職業領隊
耳聽八方 專收好料