英超快車去到第2擊，昆士柏流浪及韋斯咸啱啱輸波，今次返主場，會識變身；另外熱刺越踢越好，今晚頭場仍受讓，唔會怕紅魔來襲。
拆禮物日，如果計「澳彩」亞洲盤，開出「7上3下」，排名前9位球隊當中，僅韋斯咸敗走1哥車路士，其餘成功拆到禮物；隔日再戰，熱、冷整體其實都係參半，波友要小心取捨了。車路士及曼城，兩支藍軍，有越放越遠之勢，無鋒陣嘅曼城，聯賽已7連勝，今晚迎魚腩般尼，後者少大敗，小弟鍾意攻擊熱門，都唔敢同藍月亮作對。車路士更勁，筆者服了，作客讓到修咸頓半/一，睇唔通，避之則吉。
前晚，3隊波最似揸流攤下輸波，分別係後防鬆散、前線首次畀「牛奶嘴」阿當岩士唐擔正嘅紐卡素、收起桑治及迪亞法沙高，被車路士圍攻嘅韋斯咸；同埋半放棄同阿奴一戰，踢多個照輸嘅昆士柏流浪。所以，今次先攻擊作客仍要讓波嘅曼聯！曼聯近況當然好，但輕取半力紐記，主要對手多番走甩改踢中場、八面玲瓏嘅朗尼；其實本身傷兵潮未停過，迪馬利亞臨場又傷，費蘭尼感冒冇出，其3-5-2陣式，強於兩翼側擊；但今場作客到非常硬淨嘅熱刺，未必食得住！
熱刺排名越踢越上，右閘基爾獲加（圖）復出後，側擊更強；基斯甸艾歷臣復任中場重心，表現不遜朗尼。球隊近5場聯賽3勝，只敗走過「無敵車」，贏波比數都係2:1同當中兩場比賽都後段入波奠勝，反映鬥志、體力處高點，人腳充裕利輪換，紅魔一向擔飛，熱刺夠勇仍成冷門，下盤及冷敲D可取。
阿奴難擋槌仔幫
下游大戰，取讓水晶宮平/半嘅昆士柏。老列納，老江湖，剛戰突用「里奧」同卡蘭積卡等自己友擔正，全程縮後主守，好似怕咗主場嘅阿仙奴，只不過兵工廠無厘頭，下半場少踢1人，令戰情稍為緊湊。昆士柏，主場王，近5戰4勝1和，射手查理柯士甸入咗8粒；咁啱對手水晶宮極頹，冇咗查馬克，中場串連影響好大，啱啱輸畀修咸頓傷埋另一鋒將費沙甘保，呢場波未必好睇，但熱門隊中，昆軍最可取！
最揸流攤球員，一定係阿仙奴中鋒基奧特，衝動頭撞對手被逐，要跨年停賽；球隊今晚作客必現真身嘅韋斯咸，冇埋「基佬」，阿仙奴應付對手高空波狂炸更蝕底，廠迷睇波，食定驚風散好啲！
波神
神級攻略 智破足彩