聖誕剛剛過去，龍叔叔好例牌咁參加咗幾個party、食咗幾件火雞，亦好例牌咁翻睇多次《Love Actually》，浪漫甜蜜親情友情一次過大爆發，其實比出街同人逼住睇燈飾，更有節日氣氛。有啲戲，就算翻睇超過十次，你都唔會覺厭煩，任可一位戲迷碰到呢啲經典，真係會心存感恩。呢個禮拜有兩隻藍光派街，一套《忍者龜》一套《一個人的武林》，唔使感恩，純當娛樂片過日辰。荷李活CG特技係好睇，不過四隻龜真人化後造型確係有啲重口味，我寧願睇丹爺繼續做超人儆惡除奸。
電影開宗明義話向香港武術界致敬，好多武術界名人都有參演，戲內亦不時出現經典功夫電影海報同場面，香港人應該睇得幾有感覺。
丹爺嘅戲，每次都好明顯睇到佢好努力放低chok樣同星味，今次《一》嘅劇本，對佢嚟講其實幾有發揮，以囚犯身份協助警方偵破一連串武術界名人被殺案件。雖然呢條橋玩得唔夠《沉默的羔羊》高明，不過加埋《七宗罪》式犯案手法就幾有睇頭。由擒拿、拳術、兵器到腿法，邊個最勁就殺邊個，而且每場戲都由唔同武術指導負責，董瑋、元彬、嚴華等，拍出各具特色嘅對決場面，如狹窄斗室內鬥擒拿、大型化石展品上鬥腿功等，都拍得令人驚喜。最令龍叔叔眼前一亮嘅，係喺《人在囧途》一炮而紅嘅諧星王寶強，扮演武癡殺人狂，既有殺手兇狠眼神，每次仲拋低一句：「既分高下，也決生死！」跟手就用你最強嗰瓣做低你，嗰份霸氣仲勁過丹爺。王寶強比丹爺更多打戲，每樣功夫都睇到佢有真正練過，最後大家忽然醒覺，原來王寶強N年前係少林弟子出身，唔拍打戲根本係一種浪費。
王寶強有驚喜，丹爺都算OK，成套戲最令人失望嘅，係扮差婆嘅楊采妮。造型及姿勢無半點高級女警司台型，角色又純粹跟住劇情走，比配角更配角，龍叔叔當年嘅采妮BB，其實真係唔適合扮差婆，做番感情受傷小女人好過啦。
拳拳到肉的精采
聲畫上，《一》絕對合格有餘，好多場景都係昏暗密室嘅打鬥，畫面上幾激烈嘅動作，都好精細咁表達到，算係達到一級水準。只係尾場貨櫃車大戰，喺戲院睇都算OK，返到屋企睇，會覺得CG特技都幾假。聲音採用DTS-HD MA 7.1，以48kHz收錄，聲音定位及特效聲上，始終有種港產片嘅味精感覺，反而低音表現不俗，棍棍扑頭、拳拳到肉嘅實在感，都靠重低音喇叭傳出嚟，算係為BD加番唔少分。
Bonus收錄尚算豐富，預告片、劇照以外，仲有製作特輯同場地焦點，講番幾場大型打鬥戲嘅拍攝情形，睇得都幾過癮。較特別係有一part同戲院版結尾時一樣，有一段向功夫界台前幕後名人致敬嘅短片，見番好多年紀大嘅明星，但龍叔叔好奇一問，點解冇洪金寶同周星馳份？所謂致敬，會唔會小圈子咗啲？
Profile：
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
