【《蘋果》專訪】佔領、絕食甚至衝擊也好持續兩個月的抗爭運動，未令中央就8.31人大決定作半點讓步。身兼港區人大代表的新民黨副主席田北辰認為，中央並非萬事無商量，但前提是必須互相尊重，中共新政權更要求「你畀面我、我畀面你」，若學識中共的遊戲規則，有助爭取更多實質成果。
記者：許偉賢
中央面對佔領運動寸步不讓，田北辰指佔領人士用錯方法，脅迫手段對中央政府毫無作用。「咁啱上面（北京）換朝換代，咁多年嚟未試過嘅強勢政府，應該係屬於『你畀面我、我畀面你』嘅年代。以前嘅（中共）政府呢，『你唔畀面我呀，咁算啦，香港咁鬼麻煩，咪等你搞吓囉、讓吓步囉、畀啲空間你囉』，但呢個政府唔會嘞。我覺得，如果要爭取啲乜嘢呢，面對呢個政府，一定要識用一啲方法」。
他所說的方法，是互相尊重開展溝通，但這一點連泛民主派也未達標。他以4月泛民獲邀到上海訪問為例，不點名指有代表（公民黨郭家麒）在街頭派爭普選傳單：「人哋（中央）有心同你傾，你就落佢面。喂！咁一國大過兩制㗎嘛，即係有時要諗番，我哋要識點deal with共產黨……點解要明白共產黨嘅DNA係點？咁你就不切實際，因回歸咗喇嘛。」
「表述方式要適當」
曾就趙連海及李旺陽事件去信中央要求徹查的田稱中央不太介意港人立場為何，反而介意表述及處事方式，引述港澳辦主任王光亞曾對他說：「佢話你哋啲香港人大代表，係應該講㗎（對中央的不同意見），但表述方式要適當。」他深信政改仍有得傾，「但一定要尊重佢」，保存管治13億人口所需的權威，「（若）你哋700萬人日日指指點點，請你嚟傾都走嚟玩我，咁佢唔擔心入面13億人口點諗咩？」
當然，有些底線不可觸及，包括因普選而叫梁振英下台。「咁佢哋（中央）都有睇過，如果你叫CY落台，係插佢嘅僭建、乜乜乜嗰啲，可能都未必出事嘅，但如果係話政改過唔到，就係佢CY嘅問題。平心而論，係咪真係有關係？由頭到尾，係人都知中央操盤㗎啦。（因為政改叫CY下台等於叫中央下台？）係呀，所以點解（如此要求）觸動到佢哋嘅神經呢？因為操盤嘅係中央唔係梁振英」。其兄長田北俊就在今年10月底，因為促梁考慮辭職，而被中央免去全國政協委員資格。
