【本報訊】何洪希年老退休，同有傘王之稱的「威哥」邱耀威，今年也已60歲，他笑指一對成年子女，見到針線已掉頭走，一樣後繼無人，「駁番支骨收你廿蚊，平均每把要搞成粒鐘，靠佢生活應該死得」。威哥說，補遮好比助人修補回憶，滿足感遠勝金錢。這些年，他就遇過長情婆婆拿着初戀時用的雨傘到來求救，還有希望藉撐起雨傘、重新找回甜蜜感覺的失戀男。
位於北河街的「新藝城」，驟眼看沒特別，但看看招牌，寫着「清道光二十二年創」（1842），蓄着大鬍子的威哥，正是第五代傳人。每把爛遮，都有個人情小故事。
80歲夫婦整定情遮
「試過有個後生仔，攞咗把行內俗稱垃圾遮嚟維修，四條遮骨斷晒，單係換遮骨要80蚊，我話你把遮新買都係20蚊，整咩鬼？點知佢好堅持，話把遮有佢同前女友嘅開心回憶」。
回憶無價，除了癡心情長的「現代楊過」，他還遇過一對長情老夫婦。「對夫婦有7、80歲，一攞把遮出嚟，好大臭丸味，又鬼咁爛，我話冇得整，個女人好失望，原來把遮係佢老公送畀佢嘅第一份禮物，鬼咁情深，結果我幫佢整番，仲冇收佢哋錢」。修補數十元的雨傘，有人為環保，更多人為了一份感情、一段美好的回憶，威哥認為，那是真正無價寶。