「I'm just齊昕」話Model好似做……咁，其實她沒有說錯，要躋身演藝圈發展事業，往往不似預期。回望2014年，圈中有不少藝人並不如想像般風光，瘦過部電單車的衞蘭，開完兩場演唱會仍然前途未卜；官事纏身的江若琳，雖轉戰賺人仔，但「祖家」香港的人氣插水；趙頌茹（Yu）被家暴，小三更介入離婚；亞視藝員被拖糧，惟有捱住過冬。雖則看似黑氣纏身，但還有4天便踏入2015，時來運轉，否極泰來，唔到你唔信，希望在明天嘛！
撰文：盧妹、黃曉妍、卓寶花
阿Yu 兩女開心
雖然阿Yu面對婚姻失敗，但意外為事業帶來另一番天地，加上已是兩女之母，她的新年願望相信亦是所有媽媽的心意：「我想將來我兩個女都過得開心同圓滿，日日都係Sunshine Day！」
江若琳 做埋導演
自發生合約糾紛後的江若琳事業大插水，所以她寄望新一年：「想去英國報讀導演課程，遲啲自己拍部戲叫《重見天日》，大家明白點解啦。如果未搵到投資者，自己做埋攝影先。」
衞蘭 快快拍拖
明年2月約滿，至今未獲老闆黎明傾續約，雖然她多次直言好想傾，但講到新年願望，排首位竟然係拍拖：「願望係遇到另一個對象，因為我好想拍拖！至於音樂方面，我想可以自由做音樂。」
劉心悠 完成賽跑
「希望可以順利完成馬拉松比賽，因為2014年嗰次唔係太順利，天氣凍又冷親，所以新一年想冇意外咁完成。我跑第2年時承諾自己，連續10年參加10公里賽事，今次將會係第9次。」
蔡國威 準時出糧
「希望所有員工，唔止亞視，全港打工仔都出糧期準、薪酬高，亞視電視可以繼續長做長有。」
劉錫賢 人人有工
「希望世界一切美好，人人安居樂業。呢個世界太多紛爭，希望人人有份好工作、好收入。」
黃集鋒 分享歡樂
「希望人人有工開、有錢賺。喺2015年繼續帶多啲歡樂同開心畀大家，喺事業上發展越來越好。」
雨僑 揸車醒啲
「希望手車越來越好，今年考咗車牌，仲係好渣，覺得上highway直頭會死，泊車嗰陣隔籬左右好危險。」
何佩瑜 大開殺戒
「2015年我要成魔！我好鍾意一啲好Dark、陰沉或殺人角色，因為未試過，希望新一年拍多啲戲。」
蔚雨芯 媽媽康復
「拍多啲劇、唱多啲歌，最緊要自己同父母健康。14年發生咗唔開心事，希望媽媽早日康復、爸爸生性。」
陳爽 日夜滿足
「我個B啱啱出世兩個月，日夜癲倒，不過我好enjoy日做夜做，希望大家新一年，無論日夜都滿足開心。」
梁漢文 開騷順利
「第4個紅館騷出年8月舉行，而我、蘇永康、任賢齊同黃家強下年另有大型演出，希望帶畀大家開心。」
