原本已經準備寫2014大事回顧乜乜乜，但世事永遠難料，就好似同一條馬路竟然可以4個月內俾人衝擊阻塞兩次，一次為普選，另一次係為執錢。
體育版朋友唔多唔少都會落注球賽，考眼光之餘仲等馬會出bonus，但好少聽到有長勝（輸波又點會講你聽）。但近期你上FB一定有留意到有班友，成日影叠銀紙，全個保險箱都塞爆晒嗰隻，然後有馬會中獎彩票相做證明，一注幾十萬咁買，未完，佢哋話只要畀錢入會，就會有貼士畀你跟住買，之後又晒會員留言話中波之後又換Audi 又買金勞咁。情形都幾似喺馬路飛到一街銀紙咁，個個落車執，你又點會唔心郁。學丁力話齋：貪心係人類嘅原動力，細路見到一地糖都會執嚟食。有朋友曾經撩我不如一班人夾錢入會試試，小弟自問冇橫財命，寫字佬發達認真唔多，支筆留番寫稿好過填彩票。
小賭怡情呢句冇錯，大賭係咪可以變李嘉誠？可以，如果你揸莊嘅話。情形似執錢，快手執兩張隨時過骨，一磚磚狂執就等見報再返差館，世界冇咁便宜可以一步登天，好多嘢要慢慢爭取，瞓一次街有普選咩？
梁栢堅
填詞人+彩池人