香港賽馬業同鐘錶界向來關係密切，早排國際賽就係由浪琴表贊助；而好多香港馬主，都從事名錶生意，好似今期（28日）第六場四班草地1200米賽事，初出嘅「閃耀鑽皇」馬主鄧鉅明，就係太子珠寶鐘錶老闆；同場新勝嘅「又襟又準」馬主高叔平、高鼎國，大家可能較陌生，但佢哋家族代理嘅英納格錶，喺香港已售賣幾十年，老一輩應聽過「瑞士名錶英納格，又襟又準又夠格」呢句廣告口號。「又襟又準」個馬名正係由此而來。
講番隻馬，上次跑同程1200米排14檔，諗住機會麻麻啦，點知喺韋達胯下越放越有，克服外檔阻力，擊敗實力好強嘅「英才」、「飛來猛」取勝，可見「又襟又準」潛力相當高。跑完相隔個多月，養精蓄銳等今場先再出，埋門更由韋達親試大閘，check清楚狀態，備戰夠晒誠意，今場更有運抽個1檔，形勢不知幾好。
近年英納格錶搵女神楊冪做代言人，一洗品牌較老嘅形象，據知楊冪都覺得賽馬好新鮮刺激，覺得老闆隻馬跑起嚟好威猛，如果今次請到楊冪嚟馬場打氣，人靚馬又Fit，一定氣勢大增，分分鐘就咁再下一城。