如果要八方選今年建制派風雲人物，田少冇得輸，佢堅持監督狼英施政，唔似其他建制派一味盲挺，最後仲因為叫狼英考慮落台，俾中央搣埋政協柴，但佢樂得逍遙，繼續坦率中立，呢份勇氣獲得唔少人畀like。但查實除咗率直，田少仲好有偵探頭腦，篤破成日寫文護狼嘅「金鐘仁」係乜水，令金鐘仁冇得再抹黑政界中人，係田少今年一大德政。
到底金鐘仁係邊個？八方2月都寫過，咪就係新聞統籌專員馮煒光囉。其實面具被揭破，只怪佢手多，無啦啦撰文話田少因為財團利益而唔支持辣招，事實卻非如此，辣㷫田少親自出馬去緝兇。結果皇天不負有心人，終於俾佢搵到係馮煒光整蠱做怪。雖然馮煒光冇直認，但亦冇否認係真身，自此以後金鐘仁亦退隱咯。
網民點評：
Oldgo Doo：君子坦蕩蕩，小人長戚戚。
Angus Fung：人（馮）做官你做官，做到好似做賊咁！