做女仔嘅，會唔會都有擔心過，會好似《多啦A夢》入面個靜香咁，會俾大雄裝沖涼睇全相？唔知行會成員兼新民黨主席葉劉淑儀係咪睇得太多《多啦A夢》，抑或自覺似足靜香咁有吸引力，11月初同八方吹水時，透露呢世人唔敢去台灣，原因就係──聽聞台灣啲特工好厲害，會用針孔攝錄裝人沖涼。
八方相信，幾乎日日做gym保持美好身形嘅葉劉，分享呢個「憂慮」時都冇諗過會有咁大迴響兼夾揚名國際。
事關呢單八方一出，唔只各方朋友好譁然，覺得葉劉自信過頭，先天下之憂而憂，有傳媒仲覺得茲事體大，直接向台灣國安局就此查詢。結果獲回覆，台灣係法治國家，好尊重入境人士，最後以四隻字講到明：「絕對不會。」多得八方，幫葉劉放低咗多年嚟嘅心頭大石，明年唔知會唔會去大玩一番？
網民點評：
Sam Wong：邊個會咁重口味？
Kidd Wong：多謝提供笑話。