全港最大馬主家族蕭百君一家，近年投資喺賽馬嘅金額億億聲，但今季佢哋暫時冇乜運，只憑老馬「銀飛龍」贏過一場四班賽，回報不成正比；不過蕭家有的是馬，而且仲有頂級練馬師大摩幫拖，總會有轉運嘅一日。
今期（28日）沙田賽事，蕭百君就有一對天價同主馬「聰明才智」及「魔法豪情」，雙雙列陣尾場二班1400米玩內訌，肯定成為焦點所在。
講講呢對馬嘅來頭，「聰明才智」係澳洲2040米二級賽滿利谷瓶盟主，亦係一級賽澳洲打吡殿軍；至於「魔法豪情」響意大利四戰三勝，唯一落敗係1500米一級賽準則大賽得季軍。佢哋嘅確實身價係機密，但市場上同類級數嘅馬，至少一千萬港元起錶，所以大摩訓練冇壓力就假，根本冇得嘆慢板。
睇番「魔法豪情」，已經跨季兩仗跑第二，其中上仗1400米排11檔衰位，火併年長惡馬「福毅」，只影相輸條線，完全係運氣問題，今次整個1檔全程慳位，絕對可以收復失地。至於「聰明才智」，雖然在港初出，但最近試1000米草閘，臨尾撲上跑第二好有氣勢，狀態唔成問題。蕭百君咁貴買佢哋返嚟，今場贏馬都未算完美，最好就包Q啦！