「王子」即將回歸馬德里！30歲嘅費蘭度托利斯喺車路士越踢越霉，夏天借去AC米蘭兩年以為有轉機，點知踢咗10場意甲入得1球，搞到A米嘈住要退貨，摩連奴又話車仔冇位畀佢踢，兩面不是人。咁啱母會馬德里體育會夏天使咗成1,300萬鎊收購嘅27歲意大利前鋒阿利斯奧施斯都冇碇企，兩隊一拍即合，據報費托餘下18個月借用期會喺馬體會度過，施斯就會借去A米至季尾，連A米官方電視台都話交易踏入尾聲，睇嚟好事近。
由11歲加盟、19歲做隊長到23歲離隊，費托為「床單兵團」一隊上陣244場入91球；𠵱家在外闖蕩7年半終於回家，就算正箭頭已經有「新歡」文迪蘇傑，相信馬體會粉絲都希望佢重上高峯。受意大利轉會窗限制，費托最快要出年1月5號先正式加盟，不過兩日後已經有機會喺迎戰皇家馬德里嘅西盃8強首回合上陣，甚至可能肩負終止宿敵24連勝、追平健力士紀錄嘅重大使命㖭！
識睇，一定係睇足英台【英波Live】：
http://soccer.appledaily.com
http://bit.ly/engballlive