曾幾何時亞視前身麗的時代嘅千帆並舉，打到大台轉陣應對，往矣！亦都證明亞視未必冇得做。最後搞到今時今日續牌變成未知數，員工欠薪冇糧出。亞視衰敗原因，應該唔止桂神黃興桂所講「跑得慢、唔夠快、冇速度」咁簡單，計落金主王征喺政總跳馬舞幫倒忙，再冇埋位「高層、靚仔」嘅前行政總裁盛品儒助陣，都係亞視「出事」嘅原因，作為香港「良心」，觀眾真係冇咗你唔得？
撰文：李森
【1】56變死之謎
有時唔怕生壞命，最怕改壞名，上年亞視56周年台慶由靚仔高層盛品儒喺大埔總台慶祝，不過56兩個字拼成個「死」字咁款，咁唔吉利真係令原本都冷清嘅總台更加吹起陣陣陰風！
【2】盛品儒被炒
對亞視造成最大打擊導致冇糧出、又可能續唔到牌嘅原因，就係自喻靚仔嘅盛品儒被炒，論外貌佢確實高出現任亞視一哥好多，佢走咗可能連最後一班死忠粉絲都跟埋佢走。
【3】王征擔大旗
講真，跳馬舞係冇問題；去政總門口率領亞洲先生一齊跳更加冇問題；最大問題係，你唔好一路跳一路拎住個否決牌囉！唔畀人發牌阻人發達點算香港良心？
【4】續牌凍過水
搞一個電視台最緊要係咩？咪就係個牌囉！拖糧拖到新聞部可能會集體停工，加上通訊管理局建議唔續牌喎，等於個業主準備唔租屋畀你，唔使瞓街就假啦！
【5】阿二台定律
電視機「一字無綫，二字亞視」係定律嚟嘅，等於鹹酸菜一定要夾牛歡喜！話明係阿二台，慣性收視自然唔使講都知低，今年大型節目亞洲小姐得3點（19萬）收視，亞洲先生更只有1點（約6.44萬）。
【6】「江澤民病逝」
比別人走得快有時都係致命傷，事關其他人真係冇咁前衞！亞視新聞11年7月6日全球獨家報道江澤民死訊，最後證實係誤報，甚至𠵱家江澤民都仲會間唔中出席公開活動。
【7】出走做巨星
唔好問點解留喺亞視嘅鎮台之寶只剩肥仔劉錫賢，因為個個都見到張家輝、杜汶澤離開亞視之後都可以獨當一面，有啲仲做埋影帝㖭，冇晒製作嘅亞視又點留得住人才呢？
【8】收過萬投訴
已冇劇可拍嘅亞視，搞膠味濃節目真係有一手，《ATV焦點》收視得1點竟然因為話學民思潮係破壞派而有過萬投訴，呢個奇蹟發生之後，救亞視嗰個奇蹟幾時先到？
【9】台慶大花筒
一個電視台一年搞足3次台慶，前年亞視55周年北京搞完又到香港再返廣州，一年台慶就使晒幾年嘅錢，邊可能唔窮？仲要整埋壽包用嚟掟空凳咁大嘥，呢啲咪叫先使未來錢囉！
【10】廣告消失晒
睇電視都係要有廣告喘吓氣！𠵱家亞視廣告少到幾乎冇咁滯，就連亞洲先生、亞洲小姐呢類色香味俱全嘅比賽都轉個頭又返嚟，觀眾睇節目都冇得休息梗係寧願熄機休息啦！
