吳宇森導演作品可分為三個階段，第一個階段是80、90年代時的英雄式港產電影；其次便是到荷李活發展的時期，而第三則是到內地拍攝大製作合拍片如《赤壁》及《太平輪》等，問到吳導最喜歡哪一階段的自己？他先表示每一階段都有喜歡同難忘的地方，但最懷念都是80年代的香港電影，他解釋：「嗰陣係我哋創作最好時光，大家唔只有創新精神，有創作自由同信任，《英雄本色》之後我拍《喋血雙雄》開始，我唔使劇本去拍，只係攞故事大綱同老闆講古仔，老闆就會好信任，投資人同創作者好大信任，創作者亦都好清楚個市場，好似畫家對白布，跟靈感而去創作，又幾好玩。好似20幾年前有荷李活公司想重拍《喋血雙雄》，問我要劇本，我話冇，叫佢每個畫面抄低佢就係，嗰陣香港拍電影好愉快，我好懷念。」
吳宇森又透露有計劃與徐克再次合作，更希望仿效偶像Stanley Kubrick，用少數工作團隊拍大電影：「𠵱家內地拍戲好多人，郁吓就幾百至一千人，反而增加無形壓力。」