每個人都有部智能手機嘅年代，食個漢堡包，飲支汽水都影相擺上網呃like；聖誕佳節，AC米蘭後衞阿爾拉米就同索女友施杜妮（Sidoni Biemont）合照後放上個人Twitter，雖然呃like量唔多，不過網民就話呢位model好似張栢芝。
雖然施杜妮已經32歲，比今日啱啱29歲嘅阿爾拉米大3年，但保養就非常好，完全唔似3字頭，本身佢係法國平面模特兒同電視台主持，影過唔少噴血寫真集，大騷自己35吋豐滿上圍。拉米同施杜妮11年拍拖，12年有本法國雜誌喺歐國盃期間選最索球員太太或女友，施杜妮仲高票當選，幫男友贏唔少面子㖭。
普天同慶嘅聖誕節，拉米當然帶女友出嚟見吓網民，原本一張企喺聖誕樹前嘅合照，其實都係得3百幾like，唔算好哄動，不過內地網民就話施杜妮似張栢芝；雖然早兩日電視台先重播《最愛女人購物狂》，不過我求大俠反而覺得施杜妮似名模Maggie Q多啲。既然Maggie Q已淡出香港模特兒界，施杜妮嚟香港發展都應該有作為，事關據報佢能夠講流利嘅英語。
似栢芝定Maggie Q？
雖然AC米蘭近年成績下滑，不過始終位於意大利時裝之都，唔單止球員，連WAGs都寧舍有星味。A米除咗拉米，法國幫當中，型人仲有前鋒文尼斯，佢女友艾美妮（Emelie Nefnaf）亦都係法國電視台姐仔，同文尼斯生咗個仔之後都算keep得好。A米本土派中，自然以中場蒙杜利禾嘅老婆姬絲甸娜（Cristina de Pin）最正，之前好多次意大利國家隊最索WAGs選舉，呢位前《花花公子》女郎都大熱勝出。不過我求大俠都係傳統男人，老婆最好都係賢淑行先，本田圭佑老婆美紗子，唔止靚女，仲幫本田搞掂家頭細務，真係賢妻典範。
識睇，一定係睇足英台【英波Live】：
http://soccer.appledaily.com
http://bit.ly/engballlive