冠軍騎師潘頓喺國際賽日分別策「星航渡」及「包裝鬥士」兩度犯規，共被罰停賽六個賽日，正路計佢應該選本月20號開始服刑，咁就可趕及1月18號經典一哩賽日復出，但結果佢冇咁做，選擇跑埋今期（28號）賽事先服刑，變相放棄參加總獎金600萬嘅經典一哩賽，亦冇得跑當日多場高班賽。由佢贏開嘅「聰敏不凡」、「準備就緒」等，就算入經典一哩，屆時亦都要換人。
潘頓點解咁做呢？明顯地佢一早知道今期多匹座騎贏得，食得唔好嘥，所以必須上陣，袋咗啲獎金再講，經典一哩唔理得咁多咯！睇番今期潘頓啲馬，「活力小駒」上次八九成狀態已大勝，今次跑新馬錦標，固然實食無黐牙。
其餘新接手嘅「酣睡密碼」季內亦有過好表現，公認有高質；初出嘅「閃耀鑽皇」同父同母姐姐係八捷良駒，「閃耀鑽皇」由潘頓操練多時，佢唔想今期停賽，可能正係為咗呢隻馬。
仲有大家要留意，呢日boxing day假期兼落雨，潘頓竟捱凍到場，只操三隻葉廐戰馬「榮光大道」、「精益旅程」及「育成群駒」便收工，可見心中有馬。「榮光大道」初次降入五班有利，而初出嘅「精益旅程」近三次試閘一冠兩亞，早已枕戈待發。至於「育成群駒」上次跑第三試準後，今次加眼罩有異動。計吓計吓，潘頓隨時贏四五場，難怪佢選擇跑埋今期先停賽咯！