吳宇森絕對是80、90年代香港電影中重要的一部份，由《英雄本色》、《喋血雙雄》到之後的《辣手神探》，其英雄式暴力美學及手足之間的熱血浪漫情誼獲得一致讚賞及注目，連荷李活大導演昆頓塔倫天奴（Quentin Tarantino）亦曾透過電影向此獨特風格致敬。一向拍慣英雄式暴力電影的吳導，年前一直跟淋巴癌搏鬥，經歷了這場人生最大戰役之後，其電影風格明顯有所改變，新作《太平輪：亂世浮生》沒有了以往作品的快意恩仇，換來的卻是希望與愛。
撰文：文國駿
吳宇森導演早前為宣傳其執導的新片《太平輪》於澳門接受本報專訪，筆者對上一次採訪吳導已是大約5年前在威尼斯影展，當時的他還未確診淋巴癌而休息，不過就當天看來，已戰勝淋巴癌的吳導比起5年前精神更好，親切依然。
不少看過電影的人跟筆者同樣心中有個疑問，就是為何要宋慧喬學好中文念對白飾演來自上海的千金小姐，而不從內地眾多一線花旦中揀選其一？吳宇森解釋源自多年前跟宋慧喬在康城影展的一次偶遇，他說：「我選演員冇根據國籍、名氣去揀，其實佢係我第一個定落嘅演員，係劇本未成形之前，我就屬意由佢飾演上海千金小姐，佢氣質美貌都好合適，有年我喺康城見過佢，好高貴，有特殊氣質，喺沙灘上散步都好似一個會寫詩嘅女孩子。」所以話，人靚果然有着數。
自言內斂似金城武
吳宇森又透露金城武所演的角色他本屬意張震，可是因自己患病令電影一拖再拖，令到對方檔期未能遷就：「角色要壓抑憂鬱，我搵咗金城武幫手，佢話夢寐以求，佢係一個感情豐富嘅人，好適合。」
戲中最主要的三條感情線，分別是黃曉明與宋慧喬；章子怡與佟大為；金城武及長澤正美，吳宇森坦言對金城武那一條線最為偏愛：「章子怡嗰段就係可愛，兩個都好單純，雖然章子怡戲中係妓女，但佢都有愛同夢想去不停追求，係支持佢嘅生命力。至於我最喜歡係金城武同長澤嗰一條線，因為好悲劇性，但我覺得係最浪漫，相愛而不能愛，無奈而淒美。」問到他覺得自己似佟大為的一片癡心還是金城武的處處壓抑？他謂自己較似金城武的類型：「我係壓抑，可能生活上同周圍環境，仲有傳統，心中有種美有種浪漫不能做到，生活上我好喜歡小朋友，尤其同情山區窮學生，成日想幫佢哋做個圖書館，成日做唔到所以心好難過，但我唔輕易表露出嚟。」
戰勝癌魔珍惜親情
吳宇森在開拍《太平輪》的籌備時期確診患上淋巴癌，到病癒後才繼續拍攝，問到他的電影風格或人生有否因是次患病而改變？他不諱言：「唔多唔少都有改變，我患病時家人不停照顧住我、陪我，佢哋對我無微不至，我覺得我欠佢哋太多，我同自己講要減少工作，補償番佢哋，平時冇乜時間陪佢哋，冇時間去聽佢哋嘅感受，我係一個好唔成功嘅父親。由於呢份愛令我以後創作，冇仇恨冇壞人，只有人性、生活化，好似今次電影入面嘅人都係對抗命運而非深仇大恨，我都好想嘗試拍一些溫馨電影，好似拍吓學生喺艱難環境下努力讀書，總之我個世界觀係緩和咗落嚟。」
雖說吳宇森這次以愛與希望為主題，但戲中仍不乏大型戰爭場面，問他是否對於大型動作場面有種不捨？他否認：「嗰啲大場面唔係為拍而拍，我希望用戰爭拍到嗰種力度，因為戲入面兩場戰役都係殘酷，尤其到內戰時自己人自相殘殺，係人世間最殘酷嘅事，所以大場面係有目的去做，唔係刻意拍番動作，當中仲有詩意空間，用咗唔少音樂表現自相殘殺嘅哀傷。」吳宇森又表示整套電影當中，其中最難拍的是「水」，他說：「沉船場面對我團隊嚟講係一個大挑戰。因為水真係好難拍，咁多樣特技入面做水可以話係最高難度同最貴，呢方面仍然要用外國技術，反而其他就可以喺內地做。」