每逢年底都有啲指定動作要做吓，必備當然係回顧呢一年到底搞過乜東東；無論係純粹懷念或前事不忘、後事之師，始終都係大家走過嘅日子，留下嘅記憶好難磨滅。八方都趁年底同大家嚟個大檢閱，搵番今年八大可堪回味嘅報道同構圖，藉此多謝呢班政壇中人，不惜施展渾身解數，提供無限創意，陪住大家，笑與淚中一齊行。
最爆紅開胃 重口味人形龍蝦 熟不可忍
時裝嘅嘢，真係各花入各眼、各有各口味，而狼太就好成功喺今個月初，憑住一套大紅人形龍蝦裝，吸引到全城聚「睛」會神地關注，無論係龍蝦配伊麵、抑或龍蝦「熟」不可忍，都係維肖維妙。八方聽聞，官場都因此惹起一陣龍蝦熱潮。話說各政府部門年底都會搞吓聖誕party，有啲會叫外賣到會，預備嘢食大擦一番，而今年落柯打時，個個都厚多士咁問一句：「有冇龍蝦食㗎？」就知呢道由狼太親身演繹嘅「菜式」，真係令大家唔食都睇得招積。
當日八方刊登狼太人形龍蝦照，都估唔到會掀起咁大收看熱浪，仲激發改歌詞嘅創意。其後度身訂做漫畫，除咗博大家一笑，亦歡迎剪低留念。而呢單原本係政界嘅熱話，已經跨界成為咗時裝界熱爆gossip。
網民點評：
Esther Lam：都係唐太好睇，樣子不算突出，但係人善良可親，極大分別。
Wing Keung Chui：影響食慾，對龍蝦改觀。
李八方
mailto:[email protected]