一位在新加坡教書的香港人教授近兩年屢屢唱淡香港樓市，主張香港向新加坡學習，以更嚴厲招數打壓樓市。點知道，佢一路唱淡，香港樓價一路升，特區政府即使在梁振英於2012年上台後，推出雙辣招、三辣招，講話壓抑需求，但本港對樓宇的剛性需求始終壓唔住，樓價越升越有，卒之以實用呎價計，不少新界樓已升到每呎萬元以上，港島區更動輒呎價兩三萬。呢位教授大概抵唔住頸，近日又再大力唱淡，指本港樓價在2015-2019年間，會出現爆破，2016年係緊張時刻，樓價會下跌四至六成，拖冧經濟，失業率回升至雙位數字，香港有排衰。
嚇死人咩。過往幾年，對樓市評估，樓價預測，左丁山只信林奮強一個，佢十年來睇好樓價，原則不變，佢在2012年中預備沽售名下物業其中五個單位，只因為套現準備做行政會議成員五年，點知賣咗兩個就遇上辣招風波，佢自政壇引退，之後唔再賣樓，兩年幾來佢一路看好樓市，因為有三大因素，（一）香港失業率低，人人有工做；（二）香港打工仔年年加薪；（三）利率奇低，會維持一段長時間，即使加息，比1997仍然差得好遠。
過往幾年，呢三大因素活靈活現，係人都見到，見得到而唱淡樓市，顯然係經濟推理有問題，且看12月18日發表之失業數字，九至十一月失業率維持於3.3%，過往十二個月，失業率在3.1%至3.3%之間窄幅移動，意味全民就業；家庭收入數字方面，2014年8至10月嘅家庭住戶月入有驚喜，家庭收入高過十萬元或以上嘅數目比去年同期增加2萬戶，即19.8%，升至12.1萬戶，月入五萬至五萬九千九元嘅戶數增加九千戶，升至13.5萬戶，即7.1%，現在一共有66.4萬戶月入超過四萬元，比2013年同期增加6.75%。至於加息，目前只有美國有此條件，但耶倫已講明調整利率要有耐性，明年第一季一定按兵不動，2015年4月後可能加息率，但肯定唔會大升，而係逐步逐步嚟，務其不會扼殺美國GDP增長率及就業增長。但同一時間，美國話加息，中國就搞減息與降準，刺激股市上升，製造財富效應。綜合嚟睇，香港樓市會唔會大跌四至六成呀？除非油價不斷下滑到每桶40美元以下水平，引發委內瑞拉與俄羅斯賴債違約，再度引起金融海嘯啦！