民建聯早前先後有兩個區議員趁聖誕同大家講聲「Marry Chrismax」，搞到連發展局fb都抽水暗寸民建聯，而遠在歐洲過白色聖誕嘅自由黨田北俊都抽埋一份，噚日喺fb上載咗張佢企喺聖誕樹前嘅相（圖），仲加多句：「祝各位facebook朋友，聖誕快樂！Marry Chrismax!!! Oh No，個孫話應該係Merry Christmas!」田少出動到乖孫串啱「聖誕快樂」嘅英文，都算畀面民記！
除咗「Marry Chrismax」俾人抽水，噚日網上又流傳一張民建聯「才子」鍾樹根fb留言嘅cap圖，內容係「ATV進步維谷」，八方嘗試打去求證兼請教，不過Tree根未有回覆，但就發現佢fb個post已經改咗做「亞視進退維谷」喇。