佔領行動結束，泛民同建制立法會議員都可以趁聖誕假休息一陣喇！不過立法會秘書長陳維安喺呢個假期，恐怕就冇得唞，而且仲相當頭痕，因為建制派議員同泛民議員助理正為立會保安升級問題，各自向陳維安施壓，令佢左右做人難。
話說立會行政管理委員會早排通過咗新安排加強保安，嚴打訪客喺冇議員在場下，於午夜12點至朝早6點喺立法會大樓內屈蛇，仲將議員助理嘅職員證權限，設定到只限所屬樓層使用，原因就係建制派議員針對佔領期間，泛民將議辦用作支援佔領大本營。
不過有議助同八方講，呢啲安排引發好多問題，好似以往有訪客，接待處打個電話去議員辦公室確認就會放行，𠵱家要求議助落去大堂接人，最大問題係早排立會走火警，議助先發現佢哋張證冇開後樓梯門嘅權限，真係火燭嘅話隨時一鑊熟！班泛民助理見咁大問題，聖誕假前就梗係約秘書長陳維安反映啦。
家嫂上身 得個傾字
點知陳維安喺席間即時家嫂上身，狂呻建制議員喺佔領期間畀佢好大壓力，要秘書處做好保安同樓層管理，又暗示措施係為日後政改爭議做好預防，就算到時有人想圍攻立法會，都唔可以喺大樓入面接應。結果雙方講咗個幾鐘都不得要領，陳維安惟有話會將佢哋嘅意見向行管會反映啦！立會秘書處一向政治中立，陳維安今次夾喺中間，真係順得哥情失嫂意，睇怕呢個聖誕假都幾頭痕，要諗吓點拆彈喇。
李八方
mailto:[email protected]