如果問曼聯領隊雲高爾想要咩聖誕願望，相信佢渴望得到車路士嘅醫療團隊。「傷兵滿營」呢4隻字，近年經常同曼聯、阿仙奴、利物浦、曼城拉上關係，但車路士總係得天獨厚，班主力好似唔識傷咁。與其信車仔好運，小弟會覺得係人嘅功勞。
根據網站injury league今季嘅統計，越高分嘅球隊代表傷兵情況越嚴重，曼聯149分，阿仙奴122分，利物浦105分，啲前鋒傷晒嘅曼城都有58分，至於車路士係得42分，係全個聯賽傷兵問題最少嘅球隊！車仔少傷兵，唔單止係今季，上季佢哋所有球員入面，係得雲堅基爾因傷缺陣咗7成比賽，其餘球員因傷缺陣嘅比例都喺25%或以下。對比曼聯，紅魔上季有6名球員因傷缺陣超過25%比賽，包括尹佩斯（紅衫）等主力。當其他英超強隊都俾傷兵問題搞到周身蟻時，係得車路士冇事，相信藍戰士喺醫療同體能團隊一定有啲秘訣。
講番曼聯，如果紅魔想成績更進一步，前提係要「夫添」，等一班球員可以穩定地上陣，喺實戰中實踐雲高爾所講嘅理念。場場都唔齊腳，中堅組合焗住成日轉，真係費格遜喺度都搞唔掂。早前有報道話，曼城領隊比歷連尼覺得啲球員成日肌肉受傷唔太尋常，決定調查，或者曼聯、阿仙奴都應該查一查，同埋試吓借鏡車仔嘅經驗，解開傷病之謎。
文：咖喱