前港姐王愛倫個仔林建億（Chester）今年25歲，屋企有兩億身家嘅佢向來「識玩識食」，夜蒲、攬女已是家常便飯，噚日凌晨1點幾，Chester帶住幾分醉意喺中環出現；不過，今次全程陪喺佢身邊嘅唔係佢平日鍾情嘅洋妞，只係一個打扮普通、束馬尾辮嘅長髮女，兩人邊行邊講邊笑，Chester心情明顯靚爆，直到發現有記者影相先發惡爆粗鬧人。
刻意保持距離
馬尾女發現記者影相後，即時放慢腳步同Chester保持幾個身位距離，又用手提電話遮住塊面，而本來一支箭咁標前咗嘅Chester突然又放慢腳步，然後笑住問有份影嘅馮仁昭：「佢係邊個你知唔知呀？」馮仁昭話唔知道嗰時，馬尾女就無端端自己答：「我唔係何超蓮呀！」最奇怪係由頭到尾都冇人誤會過佢係何超蓮喎！之後Chester再急步向前跑，馬尾女亦加速追近他，但就被Chester示意唔好走咁埋，然後兩個人再走入一間夜店繼續蒲。
撰文：馮仁昭