一年容易又聖誕，一早安排好晒節目嘅巴打絲打們，恭喜晒；不過，冇着落但又唔想home alone翻煲《Love Actually》、唱住《Merry Christmas to me》過lonely Christmas？外國勢力幫到你！我求大俠唔係呼籲大家喺香港撈唔掂就出走，而係可以上網欣賞吓德乙球會柏林聯嘅心思，點樣可以喺又空虛又寂寞又凍嘅時候，以心中暖流同寒風對抗。
12年間百人變過萬人
每年嘅12月23號晚，柏林聯都會喺主場老森林球場搞個聖誕報佳音派對，邀請成班球迷入場參與呢項特備節目。雖然球隊今季只係以德乙中游嘅第10名過冬，但都無損fans嘅熱情，吸引到成27,500人入場，一齊唱足個半鐘。據講今年係柏林聯第12年搞呢個集體報佳音節目，原來當年第一次搞嘅時候，只係得唔夠100個熱血fans嚟撐場；到咗𠵱家多人到塞爆個球場喳。
講番當晚嘅報佳音，我求大俠覺得氣氛仲好過啲唔識唱歌嘅明星仔喺紅館開騷，絕對值得推介。當地一間中學派出合唱團幫手帶唱，全場幾萬人就一呼百應；雖然應該事前冇夾過，但係都唱得幾齊，而且人人都舉起一支蠟燭，場面不知幾咁壯觀。搞到我求大俠都充滿正能量，差啲想唱番首《一點燭光》和應吓。
如果大家覺得呢個活動幾得意，有興趣仿效班德國球迷集體報佳音嘅，唔好等嘞，去馬啦。就算一開始得嗰幾丁友發起，好似冇乜人理都唔驚，睇吓柏林聯班fans就知，只要有熱誠、夠堅持嘅話，最終一定感動到好多人，加入齊齊撐場。
拜仁聖誕雜錦有球迷心
柏林聯識做之外，啱啱做咗德甲冬季冠軍嘅拜仁慕尼黑，趁聖誕期間同球迷打好關係，唱歌拍片齊賀聖誕。拜仁成隊球員唱聖誕歌，剪輯埋各地拜仁迷send嚟嘅片，湊成一隻完整嘅《We wish you a merry Christmas》，都幾有球迷心。
識睇，一定係睇足英台【英波Live】：
http://soccer.appledaily.com
http://bit.ly/engballlive