又到聖誕，又到聖誕，本地體壇猛將忙足一年，聖誕佳節當前都出盡法寶慶祝。講到創意點少得「牛下女車神」李慧詩（Sarah），平安夜佢雖然遠在昆明集訓，但都用一支原子筆變出祝福，畫畫祝港人聖誕快樂。
計劃退役嘅單車港將黃蘊瑤，等咗5、6年終於可以留港過聖誕，但佢嘅隊友Sarah就繼續留喺昆明，為下月嘅哥倫比亞世界盃備戰。身為基督徒，Sarah對呢個節日特別重視，平安夜更加畫咗幅畫送畀大家，畫作入面有聖誕老人、聖誕樹同埋雪人，盡顯「女車神」嘅童真一面。不過可能鹿車太難畫，佢都搞笑咁話：「做Gym休息時畫嘅劣作，鹿車係咩樣㗎？哈哈，祝大家聖誕快樂！」
零度集訓仲要冇暖氣
喺11月嘅場地單車世界盃墨西哥站，同埋今個月初嘅倫敦站賽事，Sarah出戰凱林賽同爭先賽都無緣獎牌，世界盃排名暫時分別只係第5同第6。嚟緊1月中嘅哥倫比亞壓軸一站，係佢備戰出年法國世錦賽同埋爭里約奧運積分嘅關鍵。上個禮拜喺昆明備戰時，佢就透露當地近乎零度，間唔中會落雪，但宿舍間房就竟然冇暖氣。不過，佢喺fb post出畫作唔夠一日，已經有近500人畀Like，相信喺聖誕節都畀到唔少暖意佢啦！
張敬樂昆明寫祝福
其實除咗Sarah捱冷備戰，佢嘅師弟張敬樂都一樣喺昆明，積極備戰下一站世界盃，希望可以爭取奧運嘅場地單車全能賽積分。呢位仁川亞運銅牌得主，亦都喺fb祝大家聖誕快樂：「聖誕節了，我們整隊都在昆明訓練，為了準備世界盃，已經很多年的聖誕沒有在香港過了，不過無論在那裏，祝大家有一個開心的聖誕節，我會努力的！」
識睇，一定係睇足英台【英波Live】：
http://soccer.appledaily.com
http://bit.ly/engballlive