狗狗係人類最好嘅朋友，可以帶畀人無限歡樂。年頭先成立嘅香港治療犬協會，噚日派出12隻犬隻服務大使同一班義工，到精神病復康中心探訪一班院友。呢批犬隻服務大使，全部通過性情評估，即使同陌生人接觸都唔會發惡，可謂聽教聽話，有啲仲識得踩滑板同跨欄，𠱁到班院友個個笑逐顏開，人人爭住同狗狗影相留念。
協會總幹事盧鄺惠芬同八方講，犬隻服務大使過去大半年已探訪過10間院舍，協會長遠會訓練佢哋成為治療犬，為更多有需要人士提供動物治療服務。明年2月8號協會仲會喺將軍澳環保大道寵物公園舉行「狗狗慈善競技同樂日」，有狗狗競技比賽、攤位遊戲及寵物保健等活動，愛狗之人要留意喇。