佔中清場，喜氣洋洋，交通暢順，市民鼓掌，總之一切一切，都是佔中惹的禍，如今事過境遷，猶如光復，往後每年應辦紀念清場活動，以茲記香港重光。年近歲晚，由宗教阿頭到特首都紛紛發表聖誕新年文告，苦口婆心勸勉放下仇怨，修復撕裂，言詞懇切不亞於慈母對子女呵護，我等凡夫受教，願竭綿力，以「一笑集」為引，望港人重現歡顏。以下內容、人物，全屬子虛烏有……唔係，係子烏烏有……嗯……子鳩烏有……唉，乜鳩嗚都有啦，總之如有雷同，乃屬不幸，特此聲明。
（一）講開香港重光，老一輩即想起三年零八個月苦難日子，小時聽外婆憶述，日本仔打到嚟，最慘情試過粥水冇啖好食，唔想餓死，惟有食樹根。「樹根食得嘅咩？」驚奇的我問「咁硬點食呀？」外婆一句就噴埋嚟「你都烏啄啄，樹根唔係廢柴，裏面有汁，所以唔曉硬㗎。」「咁要點煮呢？」我問。「走難呀，仲得閒搞咁多嘢？求其舂爛啲樹根，舂到變糊仔咁就食得嘞。」阿婆娓娓道來，想起樹根的苦澀味，眼泛淚光。
𠵱家先知原來舂樹根有咁耐歷史。
（二）乜嘢係惡性循環？例子1：由賬目一塌糊塗嘅人去管你盤數；又或者2：一個袋咗五千萬但係仲話自己廉潔嘅市長繼續管理一個城市；所以3：點解唔好食豬肺？因為豬肺有哮喘藥。咁點解啲豬要食哮喘藥？因為有人衰到用痰餵豬。
忽略標點無停頓
（三）有次教做司儀技巧，發覺原來好多人照稿讀稿，完全一輪嘴，毫無節奏，更無停頓，原因之一是忽略標點符號的重要，於是我舉例「許仕仁也許仕仁何苦錢多就身痕」然後叫學生在適當處加上標點，結果，全部學生都同意在第七個字後加上逗號，句尾用問號。我話：「錯！」學生們驚訝，我解釋「在句子中間分開，頭一句就好似：許仕仁也許是人，即係好似話許仕仁未必係人，對於一個有智慧、在危難關頭幫過香港嘅人才，咁講係一種悔辱！」
「……侮辱呀，老師。」
「你識條鐵咩？我肯肯定係啱，人哋碩士教㗎！」鬧到學生頭耷耷，於是我再舉例「如果要你喺重要場合鄭重介紹救港雙雄：高達『賓』，同周『庸』出場，你哋會點講？嗱，救港呀，唔係愛港嗰兩個呀。」學生以為有詐，通通認為應不加逗點。「冇逗點？你哋支死光炮都好犀利喎！」學生們頴晒頭。
「唔明？高達超合金造㗎，你哋話冇逗號，本來係『有請高達賓！周庸！』𠵱家咪變咗大大聲講：『高達賓周庸』囉！超合金都熔，仲唔犀利？」
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登