傳統智慧話我哋知，願望講咗出嚟唔會靈，所以香港人今年由年頭到年尾講住「689下台」，當然就唔會實現，仲反而獲習總高度肯定佢嘅工作㖭；所以香港人聖誕願望應該講：「特首長做落去」、「特首長命百歲」。
小弟身為阿仙奴球迷（我再重申一次我係廠迷，唔好搞錯），其實好唔想寫阿仙奴，因為阿仙奴嘅老問題已經存在好幾年，真係講得多都口臭，但雲格（圖）固執程度真係得人驚，小弟真係要講一次：「雲格千祈唔好退休，一路帶阿仙奴落去。」
坦白講，周日作客利物浦一戰，以全場表現計，兵工廠應該係敗方，紅軍無鋒陣加上全場壓迫，阿仙奴對巴塞、拜仁都冇咁狼狽。但世事就係咁，阿仙奴全場劣勢，把握對手兩度犯錯一度領先2:1，雲格係唔係諗吓點樣保住勝果，見到法米尼孭住黃牌縛手縛腳，辛迪卡索拉尾段亦莫氣，雲格都係82分鐘先換第1個人，補時階段再換多兩人，根本只為浪費時間。
阿仙奴輸死球都唔係新鮮事，最後階段俾史卡迪爾頭槌追平。喂，雲格，你有冇做功課㗎，上季已經俾佢入兩粒，最後階段紅軍有角球，連波連尼都紅牌出場，有啲智慧就梗係人盯人，用梅迪薩卡或者哥林張伯斯盯住史卡迪爾啦，仲用區域聯防？俾史達寧、菲臘比古天奴呢啲矮仔頂得贏就無話可說，白白唔見兩分，雲格你永遠都唔會喺錯誤中學習。
文：牽牛