聖誕節有乜搞作？報佳音、睇燈飾、食大餐……勞工及福利局局長張建宗就選擇與同事嘆薑餅呷紅茶，仲話塊餅特別好味，皆因係受助於社會福利署「創業展才能」計劃提供起動基金嘅社企東華三院iBakery愛烘焙出品，認真hard sell。張建宗話截至上月，「創業展才能」計劃已經向非政府機構批出超過7,200萬元資助款額，總共創造咗超過940個職位喇。
iBakery位於金鐘添馬公園，張建宗自言經常幫襯，大讚呢間社企幫到唔少殘疾人士，佢講講吓又不忘抽佔中水，話佔領期間一個個帳篷棟喺茶座門口，影響運作，呼籲大家喺聖誕假行開添馬公園都幫襯吓。