台灣11月底舉行九合一選舉，查實唔少立法會議員都組團去觀戰，順道為未來嘅選舉偷師，好多都係由中華港澳之友協會等出埋食宿、交通費邀請交流，八方見唔少議員近日都陸續向秘書處申報番。其中九龍西立法會議員黃毓民就申報，11月22至12月1日去台灣，原來係幫東方報業集團旗下嘅ontv東網電視做主持講選情，其間包機票同食宿津貼。睇番佢去完台灣冇耐，亦由本月10日起向立法會請假到23號，之後立法會休會至出年，差唔多成個月都冇喺立法會蒲頭。
另外，八方又發現三文兩語了得、IT知識無人能及嘅Tree根近來連中樂都涉獵埋，佢向秘書處申報，本月4日起被委任為香港中樂團理事。