懲教署署長單日堅噚日出席懲教署學員結業暨署長榮休會操後，明日卸任退休，保安局局長黎棟國同前警務處長鄧竟成都有出席儀式。
單日堅話呀，為咗保障在囚人士嘅私隱，唔評論許仕仁入獄在囚嘅安排，但就透露，會因應在囚人士背景等資料，由收押所主管嘅委員會，編排院所，懲教署一定會聽取在囚人士嘅要求。
至於在囚人士，係咪可以論政呢？單日堅話，佢哋當然可以討論政治議題，只要唔違法，就唔會禁止，又話在囚人士喺獄中擁有任何物品，都要解釋理由。佢透露，獄中全部人都係用藍色原子筆㗎，如果有在囚人士要求用紅色原子筆，基於公平原則，就要解釋理由。至於在囚人士可唔可以有藍絲或黃絲？單日堅回應，監倉無咁多地方存放私人物品，亦無咁多人手成日去搜倉。