離開咗大台嘅陳法拉，上年同相戀七年嘅Neway集團太子爺薛世恒分手，仲有指佢哋要辦離婚手續，唔再係「薛家新抱」，眨下眼就過咗一年，過住單身生活嘅法拉BB現時點?睇佢嘅微博，發現法拉BB比以前更加容光煥發，不時出內地接騷、拍吓內地劇過劇癮，生活不知幾寫意。
法拉BB噚日仲好鬼馬咁喺微博貼咗張用大閘蟹遮面嘅相，一頭長直髮、冇化妝嘅法拉仲散發出一陣清純味，真係好誘人!法拉BB寫道：「等了好久，終於吃到大閘蟹！還有N道好吃的家常菜，被寵的孩子好幸福！」仲發現法拉BB左手中指戴咗隻戒指，再睇番佢之前出騷都冇戴，但私底下就戴住，好有可疑!唔通法拉BB已經有新戀情?
另外，薛家新抱諸葛紫岐噚日都喺微博晒自拍賀平安夜，留言指：「以為吃點藥就會好，結果新海盜造型誕生啦!聖誕快樂!今年是海盜聖誕!哇哈哈!」諸葛公主忽然變咗「海盜」，原來前日佢已經po腫眼相喺微博自爆左眼中毒，現時有一對免費嘅「大雙眼皮」，現時出門都要戴黑超。
諸葛公主嘅fans都擔心佢，居然問佢搞成咁，係唔係「被老公打？家暴？」，諸葛公主都講笑咁解釋：「家暴？我是葉問派的」，話自己睇咗中醫，指係由「火大發了」。