誰能明白我嗰種寂寞，八方都唔係太清楚，可能因為朋友多，有乜嘢事都可以搵到知心友，借個膊頭嚟訴吓心聲。但對於教育局局長吳得掂嚟講，似乎同佢老頂一樣，因為「獨到嘅見解」以及「過人嘅能力」，令佢哋無奈「被孤立」，喺官場內朋友都唔多個，連原來嘅左右手常任秘書長謝凌潔貞，都因為頂唔順吳得掂而要求調走。
既然不被世人明白，吳得掂惟有向非我族類尋求「慰藉」。日前佢出席北區花鳥蟲魚節開幕禮時，同嘉賓唔算談笑風生，卻同游嚟游去嘅錦鯉非常「投契」，途經一個魚缸時，更同一條「金龍」魚say hi咁滯，呢份知「愚」之樂，八方非魚，好難領略咯。