呢個聖誕，狼英應該埋首緊新一份施政報告，之前佢已經聯同財爺，陸續約見唔同政黨同團體，無論意見最後有冇被吸納，至少表面都要扮吓收集意見嘅。八方聽聞，今年除泛民外，其實都有建制派另類「杯葛」狼英嘅諮詢。
話說特首辦早前約過工業界代表林大輝，但只畀兩個時間佢揀，大輝咁啱撞晒時間出席唔到，但竟然喺回覆之後，一直冇人再跟進，另約會面時間喎。既然特首辦咁鬼冇誠意咯，大輝亦無謂自動獻身，所以會面最終不了了之，被動加入泛民「杯葛」行列。而除咗唔見面，以往大輝都會向特首辦交施政建議，但據知今年佢連建議都冇交，為免一番心機付諸東流。