平安夜，唔一定係失身夜，hehe中度過，又如何？今年政界冒起一對「璧人」，一舉一動都令粉絲肉緊到嘟嘴。學聯秘書長周永康Alex同副秘書長岑敖暉Lester，就喺噚日呢個全城希望「出入平安」嘅佳節，「拍拖更」出席商台節目，分享今年「出雙入對」。到底佢哋係咪嚟真變情侶？Alexter賣關子話「好難答」。嘩，唔通遊戲之中，忘掉輕重？
Lester肚餓會亂講嘢
Alexter噚日一齊出席商台《在晴朗的一天出發》節目，分享佔領期間點滴。原來呢次係佢哋合體後首度同場接受訪問，肯肯定係hehe團粉絲嘅陳志雲，喺節目中肉緊佢哋係咪真係情侶關係？嘩！phone in節目問呢啲，志雲大師真係好有意義呀！Lester回應：「喂，好難答㗎呢個。」Alex緊隨其後話「我都覺得好難答」，當心靈相通，誰都被誰感動，但Lester不忘話喎：「呢個真係耐人尋味。」查實同Lester咁close，女友唔呷醋咩？Alex含羞答答話，「（女友）都知道hehe嘅存在」，對此有啲尷尬㗎；Lester則話hehe傳聞出現後，有人問過佢係咪「同志」。而佢哋覺得有「hehe團」都唔係壞事，至少喺沉重抗爭中有放鬆機會。
係人都知Alex係喊包，佢噚日自爆曾經試過喺街上想喊，但唔想俾人見到，因此一個人去到中環港鐵站嘅一角悄悄落淚。至於Lester，佢話喎，若果肚餓一定要食嘢，肚餓就諗唔到嘢、會亂講嘢。哎唷，真係陰功豬，使唔使八方姨姨呵番？
李八方
mailto:[email protected]