今年平安夜不平安，告士打道無端「天降橫財」，成千幾萬新銀紙散落馬路，有市民見有大批銀紙散落馬路，有人選擇一張張一疊疊咁執走，有啲人仲坐的士絕塵而去。
不過馬路跌錢呢啲事，其實係好多部戲都有類似情節，最近可以講返《寒戰》，講警務處副處長郭富城拎住個裝住好多現鈔嘅袋，係用嚟贖返彭于晏嘅，綁匪叫郭富城就咁將袋錢由天橋掟落橋底，然後錢散到一地都係，幾個魚販見到，拿拿臨想執走晒佢。但如果噚日你喺告士打道現場，法官大人，執or not執先？
近日因為欠薪問題，個銀行戶口得返$7.94嘅黃集鋒就話：「執呢啲錢係咪犯法呢？如果你說犯法嘅話，畀你執都冇用。如果你話娛樂化，講笑咁講，我希望佢(解款車)跌錢嘅話，跌喺亞視門口仲好啦！」至於之前「一廁成名」，依家轉行教Yoga嘅Coffee就話：「我諗我唔會執啦，應該係犯法。我又唔會話特登留喺度睇，我覺得我會望一望然後繼續行。」而八両金同吳日言兩個都話唔會執，夏蕙BB仲話如果佢喺現場，佢係會執起啲錢，但係第一時間會拎啲錢去警署，因為路不拾遺呀。