在香港，名牌練馬師當然是指大摩、告束尼、方嘉柏、蔡約翰，佢哋贏馬多，亦係大賽常客，而香港嘅名牌馬販，就非大衛派斯(David Price)莫屬，佢過去最成功之作，就是一代馬王「精英大師」，仲有跨季八連捷的「盈彩繽紛」，冠軍一哩賽盟主「勝眼光」，曾高達118分嘅「鄉村樂韻」等，現役就有「魚躍鳥飛」、「鄉村輝煌」等，例子真係多到數唔晒。
其實最近Price嘅經手馬，猛咁枕住贏，「鄉村輝煌」、「詠彩繽紛」更係保持不敗，最新周日(28日)沙日四班1000米賽事，又有匹Price精品「發盈喜」初次登場。睇番蘇偉賢馬房嘅「發盈喜」，一如兩匹今季各自兩捷嘅廐侶「笑眼光」、「天長地久」，上手馬主都係Price，佢肯割愛先至得以運港，「發盈喜」不單止在澳洲贏過試閘，來港後四次試閘，亦攞到兩冠一亞一殿，擺明早熟有速度，兼且備戰工夫已做妥。更何況「發盈喜」嘅母線家族中，可發現「永利好」，「永利好」當年在港取6冠9位，贏1000至1400米，包括一班賽，有咁嘅血統背景支持，睇嚟「發盈喜」插入四班上陣，好大機會亦係超班貨色！