「大哨」朗拿度個仔朗拿德（Ronald），同佢老竇成個餅印咁，係咪一樣咁好波就唔知，但風流呢家嘢睇嚟就盡得真傳。朗拿德唔單止早熟，晨早已經入情場拍拖，最近再嚇你一驚，得嗰14歲，未夠秤就搭上咗一位27歲幼稚園女教師，唔知老竇有冇睇到眼都凸。
夠高大扮晒成年
朗拿德係大哨同前妻美蘭妮嘅愛情結晶品，00年出世，到𠵱家已經14歲仔，仲早早投身社會，喺間夜店撈份DJ工作。德仔天賦異稟，身高有成1米85，比好多成年人都仲要高。可能因為高大威猛，外形吸引到唔少女孩子，好早就已經開始拍吓拖。今年年初德仔喺佢Instagram度上載咗幾張同佢當時女朋友曼妞埃拉嘅相，仲留埋啲「我愛你」之類嘅肉麻留言。不過睇嚟呢對小情人已經分開咗，因為德仔家陣已搭上咗大姐姐新歡。
咀嘴相曝光全國嘩然
德仔識咗27歲幼稚園教師比娜迪（Lu Bernardi），仲喺社交網度上載咗佢兩個嘅咀嘴相，鬼咁親熱。啲相流出之後好快就喺巴西當地引起嘩然，點知比娜迪原來懵盛盛，聲稱自己唔知道佢位新男友係未成年，講到自己好無辜咁：「我發誓我唔知囉。我哋喺夜店識，見佢身形高大過全場所有人，點鬼知原來佢係未夠秤啫。仲有呀，係佢吹水話自己係18歲，所以我根本冇諗過佢嘅年齡問題，最緊要係大家啱傾，佢又表現得好鬼成熟呢。」
唔知係咪脫罪藉口，我求大俠就好希望佢哋之間係純真嘅愛，如果被發現有乜越軌行為嘅話，相信呢位迪姐都會幾麻煩。睇嚟德仔情史將會陸續有嚟，足球成就就話難超越朗拿度，風流史的話就真係有無限可能。
識睇，一定係睇足英台【英波Live】：
http://soccer.appledaily.com
http://bit.ly/engballlive