高登女神杜小喬早前喺fb自爆患上紅斑狼瘡症，一班網友紛紛留言令佢相當感動。前晚特別拍咗一條片放上YouTube，除咗獻聲唱At 17嘅《The best is yet to come》，仲強忍淚水答謝大家，而佢早前代言嘅手機遊戲公司仲打算幫佢開設基金，將今個月同下個月份嘅收入畀佢做醫療費，不過就已經俾小喬同經理人公司婉拒，小喬經理人徐小姐話：「真係好多謝佢哋心意，佢哋好有心，但小喬真係唔需要基金幫忙，所以都同負責人溝通咗，希望可以將相關收入轉贈畀有需要嘅人，亦等多啲人關注呢個病。」
撰文：馮仁昭