美麗有罪？劉心悠入行9年來專門「騎劫」靚女角色，由廣告、電視以至電影。今年可算是她的轉捩點，叫停「心悠BB」之名，自組經理人公司做老闆、捧自己，飾演恐怖女鬼，甚至破格參演以性為題的新片，一次過奉上三個驚喜。在情路上，劉心悠卻零驚喜，繼續交白卷。她強調單身是個人選擇，對被曲解為dry爆過活而呼冤，「我唔係dry，唔係俾人揀剩！」
統籌：林妙萍
採訪：林嘉慈
造型：趙潔恆
攝影：周樂恆
化妝：Jan Chan of Annie G. Chan Make-up Centre
髮型：Eric Chow of Xenter
劉心悠大半年前接受記者訪問時，自組的新公司在起步階段，涉獵的電影角色開始廣泛起來，嘗試脫離美女框架，首次醜化演白面女鬼。清純女神還破戒，初次擔正開宗明義講性事的新片《小姐誘心》，單看牌面，噱頭十足，而女神的確豁出去，與對手周柏豪肉緊咀嘴演床戲，又cosplay色誘對方，場面火辣，戲中角色為生B拼盡全力。
生B有壓力
現實中的劉心悠卻將婚姻、生B拋諸腦後，縱然已屆33歲適婚和生育年齡，仍沒有為人生大事定下時間表，「盡量唔好畀個number去框住自己嘅選擇，唔係話幾多歲需要做啲乜嘢事，尤其是生BB呢啲大事。」口裏說不，心底還是憧憬生兒育女，「我好鍾意小朋友，但我都喺餐廳見過小朋友百厭嘅時候，我都真係好想使用暴力囉，我都好難想像第日我有小朋友嘅時候，我係咪好有耐性，我係希望以後有機會有小朋友。」
任何人都沒有逆轉年齡、身體機能的能力，所以結婚與生B的壓力還是存在，「身邊有兩個好好嘅女性朋友，一個生咗兩個，一個生咗一個，個個都話要生BB就要快，咁我get到佢哋擔心我嘅初衷，但有啲嘢唔急得，好講緣份。」入行多年，劉心悠的緋聞寥寥可數，僅有鄭嘉穎及余文樂。靚女其實不乏追求者，不過掛在口唇邊的總是忙碌的工作，又未準備好迎接愛情，往往緣份未到，「冇因為開咗公司而唔拍拖，我依然會出去識新朋友，男女都係，目前為止未遇到。」
單身是選擇
單身多時的劉心悠樂得逍遙，早前趁工作改期的兩星期空檔，臨時臨急出機票飛去美國，參觀美國太空總署、動物園，體驗在港接觸不到的事物，證明單身也不一定悶爆，「我覺得你哋悶啲，你哋睇我覺得好悶，成日話我好dry，哎呀，其實我唔係㗎，我覺得我唔係俾人揀剩，係我嘅choice to be single，I am single，I don't have a problem，不過身邊朋友就擔心如果我第日想生BB，驚我到時體質上面唔夠𠵱家健康，但都係有方法可以解決，所以我覺得我係single by choice。」
面對單身等於生活枯燥乏味的指控，她一臉無奈，「我好正常，平時渴望多啲時間同屋企人做啲嘢，我屋企人分散喺唔同地方，有啲喺內地、台灣、加拿大，我會爭取時間同機會，同佢哋做啲嘢，平時唔使開工，除埋做運動之餘，就係同屋企人逃亡，哈哈。」
女神的睡衣
劉心悠不與性感掛鈎，單憑精靈大眼、酒窩甜笑的標致外貌，被捧為女神，在新片首次大膽挑戰個人底線，演床戲及穿薄睡衣，引發無限遐想。她因相信兩度合作的電影人葉念琛，在故事細節未敲定前就接拍，直至埋位拍攝亦沒有拒絕。
相信大銀幕下的女神睡衣更引人入勝，由她親自揭開謎底，「會唔會開冷氣先？哈哈哈。」開冷氣與否，衣着原來大不同，「有分別㗎，如果冬天呢，我開始鍾意着一套嘅，好似喺上海街頭你會見到有人着全套卡通，好彩色、好復古囉。夏天開冷氣都唔會着得太少，因為好易感冒，我會有件褸。」
更多精采時尚內容，盡在 http://add.appledaily.com。